தொகுதி மறுவரையறையால் தமிழ்நாட்டுக்கு பாதிப்பில்லை - அமித்ஷா உறுதி

தொகுதி மறுவரையறை பணியால் தமிழ்நாட்டுக்கு எந்தவித பாதிப்பும் ஏற்படாது என மத்திய உள்துறை அமைச்சர் அமித்ஷா இன்று உறுதி அளித்தார். 2026ஆம் ஆண்டுக்குப் பிறகு நடைபெறவுள்ள தொகுதி மறுவரையறை பணியில் மக்கள்தொகை கட்டுப்பாடு கொள்கையை பின்பற்றிய மாநிலங்கள் தண்டிக்கப்படமாட்டாது என தெரிவித்தார். மக்கள்தொகை அடிப்படையிலான தொகுதி மறுவரையறையில் தமிழ்நாட்டின் தற்போதைய 39 லோக்சபா தொகுதிகள் பாதுகாக்கப்படும் என அமித்ஷா கூறினார். குடும்பக் கட்டுப்பாடு நடவடிக்கைகளை வெற்றிகரமாக செயல்படுத்திய தமிழ்நாடு போன்ற மாநிலங்கள் இதனால் எந்த இழப்பையும் சந்திக்க நேரிடாது என உறுதி அளித்தார். தென்னிந்திய மாநிலங்களின் அச்சங்களை நீக்கும் வகையில் இந்த அறிவிப்பு வந்துள்ளது. மக்கள்தொகை வளர்ச்சி குறைந்த மாநிலங்களின் அரசியல் பிரதிநிதித்துவம் குறையும் என்ற கவலையை இது போக்குகிறது என அரசியல் நோக்கர்கள் கருத்து தெரிவித்துள்ளனர்.